Թերահավատ ենք, որ Սուքիասյանը լինելու է ինքնուրույն որոշումներ կայացնող մարզիչ. ՖԱՖ-ի հայտարարությունը

Հայաստանի ազգային հավաքականի «Առաջին Հայկական ճակատ» (ՖԱՖ) երկրպագուների  ֆան-շարժումը Վարուժան Սուքիասյանի` հավաքականի մարզչի պաշտոնը ստանձնելուց հետո հանդես է եկել հայտարարությամբ: 

«Վարուժան Սուքիասյանին՝ Հայաստանի հավաքականի գլխավոր մարզիչ նշանակելու հնարավոր տարբերակի մասին մենք մտահոգություն էինք հայտնել դեռևս շաբաթներ առաջ՝ մամուլի ասուլիսի ժամանակ:

Վարուժան Սուքիասյանին գլխավոր մարզիչ նշանակելու որոշումը, կարծում ենք՝ կայացվել էր շատ ավելի վաղ, իսկ Ռուբեն Հայրապետյանի արած վերջին արտահայտություններն արտերկրից մինչև 500.000-ի սահմաններում մարզիչ բերելու, Միշել Տեր-Զաքարյանի և Աբրահամ Խաշմանյանի մասին դեռ սկզբից նման էին օդ կրակելուն:

Չնեսամացնելով Վարուժան Սուքիասյանի ներդրած ավանդը հայկական ֆուտբոլում և վերջինիս համարելով տեղացի լավագույն մարզիչներից մեկը, չի կարելի չհիշել նույն Ռուբեն Հայրապետյանի կողմից Վարուժան Սուքիասյանին ուղղված մեղադրանքների մասին՝ ժամանակին հավաքականում խաղերի առուծախի, ինչպես նաև նույն թեմայով Վարուժան Սուքիասյանի մեղադրանքները մեր լեգենդար դարպասապահի՝ Բերեզովսկու հասցեին։

Վարուժան Սուքիասյանն, ի տարբերություն Սարգիս Հովսեփյանի՝ ունի մարզչական անցած ուղի ու փորձ, սակայն թերահավատ ենք, որ Սուքիասյանը լինելու է հավաքականում ինքնուրույն որոշումներ կայացնող մարզիչ»-ասված է հայտարարության մեջ։

Հիշեցնենք, որ ֆան-շարժման առաջ քաշած պահանջների մեջ մտնում էր նաև արտասահմանցի մարզչի նշանակումը, ով կլինի ճանաչված և հարուստ փորձով մասնագետ: