Ցուցմունքներ կան, որոնք փաստում են` հանցագործությունները ծրագրված էր կատարել նաև Երևանում

Այսօր yerkir.am-ի լրագրողը ՀՀ ԱԱԾ քննչական վարչության պետի տեղակալ Միքայել Համբարձումյանից հետաքրքրվեց, թե ի՞նչն է պատճառը, որ հանրության շրջանում անվստահություն կա ԱԱԾ-ի նկատմամբ, իսկ Նորք-Մարաշում խմբի վնասազերծման մասին տեղեկատվությունը միանշանակ չընդունվեց:

«Ես չեմ կարծում, որ հանրությունն անվստահություն ունի ԱԱԾ-ի նկատմամբ, ընդհակառակը` ես ի պաշտոնե առիթ եմ ունենում շփվելու բազմաթիվ քաղաքացիների հետ, և նրանք մեր ծառայության նկատմամբ առանձնահատուկ վստահություն ունեն` քննված գործերի անաչառության հետ կապված»,- ասաց նա:

Համբարձումյանը նշեց, որ ԱԱԾ-ն ամեն օր քննչական գործողություններ է կատարում, քննության առարկա են դառնում տարբեր վարկածներ:

Մեր հարցին` արդյո՞ք քննության առարկա է դարձել Արթուր Վարդանյանի այն հայտարարությունը, թե իբր այդ զենքը ցանկանում էին ուղարկել Ղարաբաղ, կամ այն, որ խմբի անդամներից մեկն ընտանիքի անդամներին հայտնել է, թե գնում է Ղարաբաղ՝ կռվելու:

«Մենք այս պահին կարող ենք բազմաթիվ վարկածներ առաջ քաշել, այդ թվում՝ ոչ իրատեսական: Կարծում եմ` համոզիչ չէ, որ էստեղից զինված մարդիկ պետք է, կամավորական խումբ կազմելով, գնան` Սիրիայում կամ այլ տարածքում մարտական գործողությունների մասնակցնեն»,- ասաց Համբարձումյանը և հավելեց, որ իրենց տվյալները հստակ են:

«Մենք ունենք գրավոր ցուցմունքներ, որոնք վկայում են, թե ինչ գործողություններ են ծրագրված եղել, որոնք պետք է ծրագրված լինեն Հայաստանի տարածքում, այդ թվում` Երևանում»,- նշեց նա: