Նորք-Մարաշում վնասազերծված հանցախումբն իր դաժանությամբ նախադեպը չի ունեցել Հայաստանում. ԱԱԾ պաշտոնյա

ՀՀ տարածքում առանձնապես ծանր հանցագործություններ նախապատրաստելու և ապօրինի ռազմամթերք պահելու դեպքի առթիվ հարուցված գործով ձերբակալվածների թիվը հասել է 21-ի, և նախաքննական մարմինը կմիջնորդի դատարան՝ նրանց կալանավորելու համար: Այս մասին այսօր լրագրողներին հայտնեց ԱԱԾ քննչական վարչության պետի տեղակալ Միքայել Համբարձումյանը:

«ԱԱԾ համատեղ միջոցառումների արդյունքում հաջողվել է բացահայտել և վնասազերծել հանցավոր խումբ, որն իր զինվածության մակարդակով, մասնակիցների թվով, ծրագրված հանցագործությունների վտանգավորությամբ, ինչու չէ` նաև դաժանությամբ նախադեպը չի ունեցել ՀՀ տարածքում: Խումբը ձևավորվել է հանցավոր կոնկրետ նպատակներ իրագործելու համար, եղել է դերաբաշխում, խումբը ֆինանսավորվել է տասնյակհազարավոր դոլարներով: Խմբի ղեկավար Արթուր Վարդանյանի կողմից ձեռնարկվել են խմբի անդամներին քողարկելու միջոցառումներ. խմբի անդամներին բաժանվել են գաղտնի հեռախոսահամարներ, որոնցով նրանք կապ են պաշտպանել միմյանց հետ և վարել հանցսգործությունների հետ կապված խոսակցություններ, սակայն խմբի գործունեությունը ԱԱԾ աշխատակիցների անձնուրաց և ջանասեր աշխատանքի արդյունքում հայտնվել է ԱԱԾ-ի տեսադաշտում»,- ասաց նա:

Միքայել Համբարձումյանը նշեց, որ ամեն օր կատարվում են ակտիվ քննչական գործողություններ: