Բժշկասոցիալական փորձաքննությանը այսուհետ, որպես դիտորդ, կմասնակցեն նաև ՀԿ-ները

Կառավարության այսօրվա նիստում աշխատանքի և սոցիալական հարցերի նախարար Արտեմ Ասատրյանը կառավարության հաստատմանը ներկայացրեց «Բժշկասոցիալական փորձաքննական հանձնաժողովների կողմից իրականացվող փորձաքննություններին հաշմանդամություն ունեցող անձանց հարցերով զբաղվող հասարակական կազմակերպությունների ներկայացուցիչների մասնակցության կարգը»: Սույն կարգով կարգավորվում են բժշկասոցիալական փորձաքննության հանձնաժողովների կողմից իրականացվող փորձաքննություններին  հաշմանդամություն ունեցող անձանց հարցերով զբաղվող հասարակական կազմակերպությունների մասնակցության հետ կապված հարաբերությունները:

Փորձաքննվող անձի համաձայնության կամ ցանկության դեպքում ապահովվում է հաշմանդամություն ունեցող անձանց և նրանց շահերը ներկայացնող հասարակական կազմակերպությունների ներկայացուցիչների մասնակցությունը բժշկասոցիալական փորձաքննության գործընթացին՝ որպես դիտորդ` ապահովելով այդ գործընթացի հրապարակայնությունն ու թափանցիկությունը:

Նպատակն է բժշկասոցիալական փորձաքննության մարմինների աշխատանքների հրապարակայնության ապահովումը, հաշմանդամություն ունեցող անձանց և նրանց շահերը ներկայացնող հասարակական կազմակերպությունների ներկայացուցիչների մասնակցության ապահովումը բժշկասոցիալական փորձաքննության գործընթացին՝ որպես դիտորդ, ԲՍՓ մարմինների կողմից փորձաքննվող անձանց նկատմամբ կայացվող որոշումների օբյեկտիվության  և թափանցիկության ապահովումը:

Որոշման ընդունումը կնպաստի բժշկասոցիալական փորձաքննության ոլորտում իրավասու մարմինների կողմից կայացվող որոշումների օբյեկտիվության բարձրացմանը,  թափանցիկության ապահովմանը, բժշկասոցիալական փորձաքննության գործընթացի բարելավմանը: