Բիոզուգարանների «կնքահայրը» պե՞տք է, ի վերջո, պատասխանատվություն կրի

ԱԺ-ում քննարկվում է «ԿԲ-ի մասին» օրենքում փոփոխություններ ու լրացումներ կատարելու հարցը: Հիմնական զեկուցող՝ ԿԲ նախագահ Արթուր Ջավադյանը նշեց, որ 2 հիմնական նպատակ ունեն՝ սահմանել ֆինանսական խմբերի կարգավորման և վերահսկողության սկզբունքները: Նաև՝ ներկայացուցչական գործառույթները լիարժեք իրականացնելու համար նախատեսվում է ԿԲ նախագահի տեղակալների թիվը ավելացնել ևս մեկով, ստեղծել նոր մարմին:

ԲՀԿ խմբակցության ղեկավար Նաիրա Զոհրաբյանը նրան հարց տվեց պատասխանատվության մասին՝ հիշեցնելով նախկին վարչապետ Տիգրան Սարգսյանի խայտառակ նախաձեռնությունը՝ թանկարժեք բիոզուգարանների գնումը:

«Ձեր տեղակալն այդ բիզուգարանների «կնքահայրն» էր և նախկին վարչապետի հետ միասին փոխանակ սոցիալական ծրագրերի վրա ծախսեր, մոտ կես միլիոն դոլար ծախսեց բիոզուգարանների վրա, որոնք հետո չկիրառվեցին: Ո՞վ պետք է պատասխանատվություն կրի այդ ամենի համար»,- հարցրեց նա:

Արթուր Ջավադյանը պատասխանեց, որ իր տեղակալը բանիմաց, միջազգայնորեն ընդունված տնտեսագետ է: «Վստահ եմ, որ ես էլ, ինքն էլ մեր բոլոր գործողությունների համար կարող ենք պատասխան տալ»,- ասաց նա:

Նաիրա Զոհրաբյանը արձագանքեց, որ ոչ մեկի տնտեսագիտական ունակությունները կասկածի տակ չի դնում, սակայն ինքը հարցնում է պաշտոնյայի պատասխանատվության մասին:

«Կարծում եմ, որ պետք է գործի պաշտոնյայի պատասխանատվության ինստիտուտը և գործում է»,- ասաց Ջավադյանը: