Հակոբ Հակոբյանի նկատմամբ քրեական հետապնդումը չի դադարեցվել

Ապօրինի ձեռնարկատիրությամբ զբաղվելուն, ապօրինի ձեռնարկատիրությանն օժանդակելուն, ինչպեսև հարկերը, տուրքերը կամ պարտադիր այլ վճարումները վճարելուց չարամտորեն խուսափելուն օժանդակելու մեջ մեղադրվող՝ ԱԺ նախկին պատգամավոր Հակոբ Հակոբյանի (Ճոյտ) նկատմամբ քրեական հետապնդումը չի դադարեցվել: Այս մասին, yerkir.am-ի գրավոր հարցմանն ի պատասխան, հայտնեցին ֆինանսների նախարարությունից՝ նշելով, որ ՀՀ ՖՆ քննչական վարչությունում դեռևս շարունակվում է գործի նախաքննությունը:

«Հակոբ Հակոբյանի նկատմամբ քրեական հետապնդումը դադարեցված չէ, և վերջինս ունի մեղադրյալի դատավարական կարգավիճակ: Բացի Հակոբյանից, սույն քրեական գործով ևս 7 անձինք ներգրավված են որպես մեղադրյալ, նրանց նկատմամբ որպես խափանման միջոց է ընտրվել ստորագրությունը չհեռանալու մասին»,- ասված է մեզ ուղղված պատասխանում:

Հիշեցնենք, որ Հակոբ Հակոբյանը մեղադրվում է ՀՀ քրեական օրենսգրքի 188-րդ հոդվածի 3-րդ մասի 1-ին կետով, 188-րդ հոդվածի 2-րդ մասով, 38-205-րդ հոդվածի 1-ին մասով, 38-188-րդ հոդվածի 3-րդ մասի 1-ն կետով, 188-րդ հոդվածի 3-րդ մասի 1-ին կետով, 38-205-րդ հոդվածի 1-ին մասով, 38-205-րդ հոդվածի 2-րդ մասով նախատեսված` հանրորեն վտանգավոր արարքներ կատարելու մեջ: Հակոբյանը կալանքի տակ էր այս տարվա փետրվարից և միայն մայիսի 4-ին նրա նկատմամբ ընտրված խափանման միջոց կալանավորումը փոխարինվեց չհեռանալու մասին ստորագրությամբ: