Ծայրահեղ ծանր վիճակում գտնվողների տեղափոխումը մեծ ռիսկի հետ է կապված. նախարար

Գիշերվա ընթացքում տասը հիվանդ ընդունվել է «Սբ Գրիգոր Լուսավորիչ» բժշկական կենտրոն, որոնցից հինգը գտնվում են ստացիոնար բուժման մեջ: «Ինչ վերաբերում է մյուս տուժածներին, որոնք ժամանել են ՀՀ, ամբուլատոր կարգով է նրանց բուժումն իրականացվելու՝ իրենց իսկ ցանկությամբ: Նրանք չունեին հակացուցումներ»,- այսօր լրագրողներին տեղեկացրեց առողջապահության նախարար Արմեն Մուրադյանը:

Նրա խոսքով` ՌԴ-ի հիվանդանոցում գտնվող մեր քաղաքացիներին բժշկական օգնություն են ցույց տալիս ինչպես հայ համայնքը, այնպես էլ ռուսները:

«Մեր ռուս գործընկերները ոչ պակաս մարդասիրությամբ, գթասիրությամբ և պրոֆեսիոնալիզմով են աչքի ընկնում: Ամբողջ այդ գործընթացը հսկվում է իրենց նախարարի կողմից»,- ասաց Մուրադյանը և հավելեց, որ բուժման ծախսերը հոգում է ՌԴ առողջապահության նախարարությունը, իսկ ՀՀ-ում գտնվողներինը`ՀՀ առողջապահության նախարարությունը:

Անդրադառնալով այն երկու վիրավորների հնարավոր տեղափոխությանը, որոնց վիճակը ծայրահեղ ծանր է, նախարարը նշեց. «Տեղափոխումը շատ մեծ ռիսկերի հետ է կապված, այդ պատճառով բժիշկները բոլոր անհրաժեշտ դեղորայքով ժամանել են հենց այդ հիվանդանոց՝ հաշվի առնելով, որ ոսկրային համակարգի լուրջ խնդիրներ կան: Մեկ հիվանդի մոտ չորս տեղից կոնքային ոսկորները կոտրվել են: Իրականում նրանց վիճակը ծայրահեղ ծանր է, և բժիշկները պայքարում են նրանց կյանքի համար»: