Իր խնամողին կծողը Զևս անունով առյուծն է, որը կենդանաբանական այգում է արդեն 7 տարի

Տեղեկացրել էինք, որ երեկ՝ ժամը 16:00-ի սահմաններում, Երևանի կենդանաբանական այգու գիշատիչների բաժնի խնամող Վարդան Գրիգորյանի ձեռքը  այգու առյուծներից մեկը վնասել է:

Yerkir.am-ին այգու հասարակայնության հետ կապերի բաժնից տեղեկացրին, որ դեպքը տեղի է ունեցել աշխատակցի անուշադրության պատճառով, նա հատել է առյուծներին մոտենալու թույլատրելի սահմանը` խախտելով գիշատիչների հետ աշխատանքի անվտանգության կանոնակարգը: Այգու անվտանգության աշխատակից Հենրի Մերխոշյանի արագ արձագանքման և ճիշտ գործողությունների շնորհիվ Վարդանին հաջողվել է ազատել և շտապ բուժօգնություն ցուցաբերել:

Հավելենք, որ խնամողի աշխատանքային երկարամյա փորձը կամ գիտելիքները չեն կարող բացառել նմանատիպ դեպքերը, եթե նա կորցնում է զգոնությունը, ապավինում կենդանու հետ իր «հատուկ կապվածությանը», չի հետևում անվտանգության սահմանված կանոնակարգին: Վարդան Գրիգորյանին, ով աշխատում է Երևանի կենդանաբանական այգում արդեն 4.5 տարի, վնասել է Զևս անունով առյուծը, որը ծնվել է Երևանի կենդանաբանական այգում 2008 թվականին:

Այս պահին Վարդանը գտնվում է թիվ 1 համալսարանական հիվանդանոցում: Բժիշկները նրա վիճակը կայուն են գնահատում, կյանքին և առողջությանը վտանգ չի սպառնում: