ԱԺ-ում հավատարմագրված լրագրողների աշխատանքին նոր խոչընդոտ են մոգոնել

Այսօր ԱԺ-ում հավատարմագրված լրագրողներն անակնկալի եկան ԱԺ հասարակայնության և լրատվության հետ կապերի բաժնի պետ Արսեն Բաբայանի պահվածքից, ով անվտանգության աշխատակիցների հետ կանգնեցրեց տասնյակ լրագրողների ու օպերատորների ԱԺ մուտքի մոտ, որտեղից ԱԺ էին մտնում վարչապետը և նախարարները:

Նա հայտարարեց, որ այսուհետ չի թույլատրվելու լրագրողներին ու օպերատորներին, որ նրանք մոտենան ԱԺ մուտքին ու հարցազրույցներ վերցնեն կառավարության ներկայացուցիչներից, որովհետև լրագրողները սպառնում են այդ պաշտոնյաների անվտանգությանը: Արսեն Բաբայանը օրինակ բերեց 1999 թվականը, երբ լրագրողը մտավ ԱԺ ու գնդակահարեց պատգամավորներին:

Լրագրողների բոլոր առարկություններն ու հիմնավորումները կտրուկ մերժում ստացան: Արսեն Բաբայանը նաև հայտարարեց, որ եթե լրագրողները դժգոհություն ունեն, թող բողոք գրեն համապատասխան մարմիններին: