Այլ երկրներից հրավերներ եղել են, բայց ես միշտ ներկայացնելու եմ Հայաստանը. Արթուր Ալեքսանյան

Ըմբշամարտի աշխարհի կրկնակի չեմպիոն Արթուր Ալեքսանյանն այսօր լրագրողների հետ զրույցում խոսեց սեպտեմբերի 7-12-ը Լաս Վեգասում տեղի ունեցած ըմբշամարտի աշխարհի առաջնության մասին:

«Շատ ուրախ եմ և հպարտ, որ կարողացա 2-րդ անգամ նվաճել աշխարհի չեմպիոնի կոչումը: Աշխարհի չեմպիոն դառնալը բարդ է, սակայն այն պահպանելն ավելի դժվար է: Այս առաջնությանը ֆիզիկապես և ֆունկցիոնալ առումով ավելի պատրաստ էի, քան նախորդ տարի: Ամեն ինչ անելու եմ, որ պահպանեմ մարզավիճակս մինչ հաջորդ տարի, որպեսզի կարողանամ նվաճել նաև օլիմպիական չեմպիոնի կոչումը»,- ասաց աշխարհի կրկնակի չեմպիոնը:

Լրագրողներից մեկի հարցին, թե երբևէ ստացե՞լ է առաջարկ այլ երկրի մարզական պատիվը պաշտպանելու համար, Ալեքսանյանը պատասխանեց. «Առաջարկներ շատ են եղել, բայց իմ մտքով երբևէ նման բան չի անցել: Ես ներկայացնում եմ Հայաստանը և միշտ էլ ներկայացնելու եմ մեր դրոշը, հիմնը և զինանշանը»: