Անցած ամառ իրավիճակն ավելի լարված էր. Մովսես Հակոբյան

«Շանթ 2015» զորավարժանքները կավարտվեն վաղը, իսկ ԶՈՒ ստորաբաժանումների համար միջոցառումները կշարունակվեն մինչեւ սեպտեմբերի 15-ը: Այս մասին հայտարարեց ՀՀ ՊՆ ԶՈՒ գլխավոր շտաբի պետի տեղակալ  Մովսես Հակոբյանը:

Մովսես Հակոբյանը տեղեկացրեց, որ  ՀՀ նախագահը պայմանական  որոշում է կայացրել երկրում ռազմական դրություն հայտարարելու մասին:  Տեսականորեն գումարվել է ԱԺ արտահերթ նիստ, որտեղ քննարկվել է այդ հարցը: Այսօր էլ նուբարաշենում փախստականների ընդունման ճամբար է բացվել, իսկ վարչապետը հանդիպել է «փախստականների» հետ:

Մովսես Հակոբյանն այսօր հերթական անգամ անդրադառանալով սահմանային լարվածությանը կրկնեց, որ լարվածությունը պարզապես զուգադիպել է զորվարժությունների հետ:

«Մենք անցյալ տարի ամռանը ավելի լարված իրավիճակ ենք ունեցել առաջնագծում  հուլիս-օգոստոս ամիսներին»,- ասաց Մովսես Հակոբյանը, նշելով, որ ամեն անգամ, երբ միջնորդները սկսում են ակտիվ աշխատել եւ հանդիպումներ կազմակերպել, Ադրբեջանը փորձում է լարել իրավիճակն առաջնագծում: Մովսես Հակոբյանը նշեց, որ առաջնագծում զինված ուժերը շարունակում են վերահսկել իրավիճակն, ինչի արդյունքում լարվածությունը կթուլանա: