Զինվորական համազգեստով բժիշկը սրախողխող էր արվել թուրք զինվորների ձեռքով

Ծնվել է 1887 թ., Կ. Պոլսում:

Նախնական կրթությունն ստացել է ծննդավայրի թաղային վարժարաններից մեկում:

1912 թ. ավարտել է Կ. Պոլսի Օսմանյան կայսերական բժշկական վարժարանը:

1912 թ.-ից բժիշկ է աշխատել:

1914 թ. ամռանը, Առաջին համաշխարհային պատերազմն սկսվելուն պես, բոլոր հայ բժիշկների հետ միասին զորակոչվել է օսմանյան բանակ և զինվորական բժիշկ ծառայելու համար Կարին ուղարկվել:

1915 թ. գարնանն սկսել են հայերի ձերբակալությունները, բանտարկություններն ու տեղահանությունը:

Հազարավոր հայ ընտանիքների թվում բժշկի ընտանիքը ևս տարագրվել է դեպի Դեյր-էլ-Զորի անապատները: Պողոս Հիսարլյանը տեղեկանալով իր ընտանիքի տարագրության մասին, դիմումներ է գրել զինվորական հրամանատարությանը և Կարինից Սեբաստիա մեկնելու թույլտվություն ստացել իր ընտանիքը փրկելու համար:

Սակայն 1915 թ. գարնանը, Կարինից Սեբաստիա մեկնելու ճանապարհին, Խարբերդի և Երզնկայի միջև, Մամախաթունի մոտերքը զինվորական համազգեստով բժիշկը սրախողխող է արվել թուրք զինվորների ձեռքով՝ 28 տարեկանում:

Մինասյան Հ., Օսմանյան կայսրությունում, Թուրքիայի Հանրապետությունում և հարակից տարածքներում բռնաճնշումների և ցեղասպանության ենթարկված հայ բժիշկներ: Համառոտ կենսագրական բառարան, Երևան, 2014, 519 էջ, էջ 201: