Արհեստականորեն ստեղծում են մի իրավիճակ, որ բախում լինի. Օսիպյանն արձագանքում է ցուցարարների նոր մարտավարությանը

Բաղրամյան պողոտայի ցուցարարներին ոստիկանությունը թույլ չի տա ամեն օր մեկ քայլ առաջ տանել բարեկադի վերածած աղբամանները: Այս լրագրողների հետ զրույցում հայտարարեց Երեւանի փոխոստիկանապետ Վալերի Օսիպյանը:

«Չեմ կարծում, որ աղբամաններն առաջ կբերեն: Եթե նրանց մեկ քայլը որեւէ բան կտա, եկեք տասը քայլ էլ մենք ավելացնենք, բայց դա ոչինչ չի տա: Եվ կարելի է տրամաբանել, որ այդ կերպ արհեստականորեն ստեղծում են մի իրավիճակ, որ բախում լինի, եւ հանրությանը ցույց տան, որ բախում կա, եկեք Բաղրամյան պողոտա»,- ասաց Վալերի Օսիպյանը:

Միեւնույն ժամանակ փոխոստիկանապետը չհստակեցրեց` ինչ քայլեր կձեռնարկի ոստիկանությունը:

Ինչպես ավելի վաղ տեղեկացրել էինք, Բաղրամյան պողոտայի ակտիվիստներից Դավիթ Սանասարյանը հայտարարել էր, որ իրենք իշխանություններին ժամանակ են տալիս մինչեւ երկուշաբթի 21:00-ն, որից հետո ամեն օր 21:00-ին մեկ քայլ առաջ են գնալու: