Խելոք, վերջին նստարանին նստած ու ամպերին նայող աշակերտներից եմ եղել. Նադեժդա Սարգսյան

«Ես շատ խելոք, վերջին նստարանին նստած ու ամպերին նայող աշակերտներից եմ եղել»,- yerkir.am-ի հետ զրույցում ասաց երգչուհի, ՀՀ մշակույթի վաստակավոր գործիչ Նադեժդա Սարգսյանը` հիշելով իր աշակերտական տարիները:

Նադեժդա Սարգսյանը սովորել է թիվ 28 ռուսական դպրոցում: Նա նշեց, որ Վերջին զանգի խնջույքն իրենց տանն էին կազմակերպել, որից հետո առավոտյան ժամը 5-ին ոտքով բարձրացել են Ծիծեռնակաբերդ:

«Մինչև առավոտյան 8-ը քայլում էինք Ծիծեռնակաբերդում, շատ տպավորիչ էր: Առաջին անգամ հագել էինք «հոլիդեյներ» և սպիտակ վերնաշապիկ: Նախկինում շատ լավ էին կազմակերպում միջոցառումները, հիմա չգիտեմ` այդպե՞ս է, թե՞ ոչ: Ես նույնիսկ Էմմիի Վերջին զանգն եմ շատ լավ հիշում, որովհետև ռեժիսորական աշխատանքներով ես էի զբաղվում: Էմմիենց Վերջին զանգի արարողությունը նույնիսկ Սունդուկյանի թատրոնում տեղի ունեցավ, այն կարծես ներկայացում լիներ»,- ասաց Նադեժդա Սարգսյանը:

Նա նշեց նաև, որ շատ էր սիրում գրականություն, ռուսաց լեզու առարկաները, բայց ոչ մի կերպ յոլա չէր գնում ֆիզիկայի, հանրահաշվի և երկրաչափության հետ:

Երգչուհին հիշեց նաև, որ դպրոցում միշտ համերգներ էին կազմակերպվում, օլիմպիադաներ, որոնց ինքն անպայման մասնակցում էր: Մեր դիտարկմանը` փաստորեն, ակտիվ աշակերտ եք եղել, պատասխանեց` ոչ, ստիպել են: