Դիսպանսերի կալանավորված բժշկուհուն կազատեն աշխատանքից

Արդեն հայտնել ենք, որ երեկ հոգեմետ դեղամիջոց ձեռք բերելու և պահելու համար ձերբակալված`  Քաղաքային էնդոկրին դիսպանսերի սրտաբանին մեղադրանք է առաջադրվել:

Նախաքննության ընթացքում պարզվել է, որ բժշկուհին, աշխատելով Քաղաքային էնդոկրին դիսպանսերում՝ որպես սրտաբան, և ունենալով լիազորություն՝ հոգեմետ դեղահաբեր դուրս գրելու, մեկ այլ բնակչուհու անվամբ դուրս է գրել հոգեմետ դեղամիջոցի` թվով 48 հատ դեղահաբերի դեղատոմս: Քննությամբ պարզվել է, որ բժշկուհին դեղահաբերից մի քանի հատն ապօրինի իրացրել է մեկ այլ քաղաքացու, որի ինքնությունը քննությամբ պարզվել է, իսկ մնացածը պահել է իր մոտ:

Yerkir.am-ի հետ զրույցում Քաղաքային էնդոկրին դիսպանսերի տնօրեն Անուշ Բունիաթյանը հայտնեց, որ հիշյալ բժշկուհին իրենց մոտ կես դրույքով է աշխատել: Տնօրենի խոսքով՝ ամեն ինչ հանկարծակի է եղել: «Նորմալ անձնավորություն էր, բայց այսօր մենք չգիտենք` նորմալի տակ ինչ է թաքնված, բայց լավ տպավորություն էր թողել` որպես բժիշկ, մասնագետ»,- ասաց նա:

Դիտարկմանը, թե հնարավո՞ր է բժշկուհին անփորձ էր և չի գիտակցել արարքի հետևանքները, տնօրենը պատասխանեց՝ ոչ: Նա նաև հայտնեց, որ սրտաբանին դեռևս աշխատանքից չեն ազատել, սակայն հետագայում հնարավոր է ազատեն:

Yerkir.am-ի տեղեկություններով` մինչ ձերբակալվելը բժշկուհու շահերը պաշտպանել է հանրային պաշտպան Արմինե Ֆանյանը: Սակայն նա մեզ տեղեկացրեց, որ սրտաբանը ձերբակալումից հետո վճարովի պաշտպան է ձեռք բերել: