Գործատու-աշխատող հարաբերությունները կպարզեցվեն

Այսօր լրագրողների հետ հանդիպման ժամանակ ՀՀ աշխատանքի և սոցիալական հարցերի նախարարության աշխատանքի և զբաղվածության վարչության պետ Թադևոս Ավետիսյանը ներկայացրեց ՀՀ աշխատանքային օրենսգրքում նախատեսվող փոփոխությունները: Նա նշեց, որ փոփոխություններն արժանացել են կառավարության հավանությանը և այժմ ներկայացվել ԱԺ-ին, նախագիծն ունի փորձագիտական եզրակացություն, որը մոտ օրերս պատրաստ կլինի:

Սահմանված կարգով այն անցել է հանրային քննարկում, որին մասնակցել են շահագրգիռ կազմակերություններ, տարբեր փորձագետներ ու անհատներ: Նախատեսվում է, որ աշխատանքի ընդունվողների համար աշխատանքային գրքույկ վարելու՝ գործատուի պարտավորությունը հանվում է, միաժամանակ, հիմնական աշխատավայրի գործատուն պարտավոր է մեկ տարվա ընթացքում իր մոտ վարվող աշխատանքային գրքույկները, օրենքով սահմանված կարգով, լրացնել ու հանձնել աշխատողներին: Այս փոփոխությունը պարզեցնում է գործատու–աշխատող հարաբերությունները, քանի որ տեղեկատվական համակարգում արդեն առկա է ողջ տեղեկատվությունը, այնպես որ` աշխատանքային գրքույկն անհրաժեշտ չէ ո'չ գործատուին, ո'չ աշխատողին աշխատանքային իրավունքի իրացման պրոցեսում:

Երկրորդ փոփոխությամբ սահմանվում է «մասնագիտական աշխատանքային ստաժ» հասկացությունը, դա մասնագիտություն ստանալուց հետո այդ մասնագիտությամբ աշխատանքային հարաբերությունների մեջ գտնվելու ժամանակահատվածն է: Նախատեսվում է, որ փորձաշրջան չի կարող պահանջվել, եթե տվյալ գործատուի մոտ աշխատողն արդեն անցել է որոշակի ուսուցում: Նախատեսվում է աշխատանքային պայմանագրում նշել փորձաշրջանի պայմանները, ամենամյա արձակուրդի տեսակները և դրա տևողությունը: Սահմանվում է գործատու-աշխատող կողմերի էլեկտրոնային ստորագրություն: