Դուք եք այն բռունցքը, որից Թուրքիան վախենում է. Կիրո Մանոյան

Այսօր Հանրապետության հրապարակում  ջահերով ավանդական երթից առաջ երիտասարդությանը ուղերձով դիմեց ՀՅԴ Բյուրոյի անդամ Կիրո Մանոյանը:

«Ամբողջ 100 տարի մեր նախնիները պայքարել են մեր նպատակների համար: Մենք քայլ առ քայլ մոտենում ենք այդ նպատակներին: Մոտենում ենք, որովհետեւ մենք հիմա ունենք Հայաստանի Հանրապետություն, Ազատ Արցախ եւ կազմակերպված Սփյուռք եւ այս եռամիասնությամբ Թուրքիային մատնել ենք խուճապի: Օրը օրի հետեւից իրենք նոր բառերով, նոր խոսքերով փորձում են մոլորեցնել աշխարհին, իբր սիրաշահել մեզ, բայց մենք այդ խարդավանքներին չենք ենթարկվի: Մենք ոչ ոքի թշնամի չենք համարում, բայց նաեւ թույլ չենք տա, որ որեւէ պետություն մեր իրավունքների հաշվին փորձի ինքը առաջ գնալ: 100 տարի առաջ տեղի ունեցած ցեղասպանությունը ճանաչվելու է, Թուրքիան ընդունելու է իր պատասխանատավությունը, եւ մենք  վերականգնելու ենք մեր իրավունքները:

Երիտասարդությու՛ն,  Հայաստանում, թե Սփյուռքի զանազան համայնքներում դուք մեկ բռունցք եք, այդ բռունցքից է, որ Թուրքիան վախենում է: Սակայն պետք է աննահանջ շարունակել պայքարը: Մեր պայքարը ինքնանպատակ չէ, ինչպես համահայկական հռչակագիրը, որ համայն հայության ներկայացուցիչների կողմից ընդունվեց: Դիմելով ձեզ, դիմելով հաջորդ սերունդերին` մենք ակնկալում ենք, որպեսզի դուք շարունակեք պայքարը հանուն ավելի հզոր Հայաստանի, ավելի ժողովրդվար Հայաստանի, հանուն հզորացած ազատագրված Արցախի, հանուն ավելի աշխույժ եւ կազմակերված սփյուռքի, հանուն հայ ժողովրդի դարավոր երազանքների իրականացման: Կեցցե ՀՀ-ն, կեցցե ազատագրված Արցախը, կեցցե ազատ, անկախ, միացյալ Հայաստանը: Ջահը փոխանցում եմ ձեզ, որպեսզի դուք լինեք ջահակիրը մեր պայքարի»,- հայտարարեց Կիրո Մանոյանը: