Քլինթոնը կմասնակցի նախագահական ընտրություններին

ԱՄՆ նախկին պետքարտուղար Հիլարի Քլինթոնն այս կիրակի, ամենայն հավանականությամբ, կհայտարարի, որ մասնակցում է նախագահական ընտրություններին: Այդ մասին հայտնել են Դեմոկրատական կուսակցությունից, տեղեկացնում է BBC-ն:

Ավելի վաղ նախագահի պաշտոնում իրենց թեկնածությունն առաջադրելու մասին հայտարարել էին հանրապետական սենատորներ Թեդ Քրուզը եւ Ռենդ Փոլը:

ԱՄՆ նախագահի ընտրությունները նախանշված են 2016 թվականի նոյեմբերի 8-ին: Վերլուծաբանները տիկին Քլինթոնին համարում են այդ ընտրություններում ֆավորիտներից մեկը:

Նշենք, որ 2008 թվականին Քլինթոնը մի անգամ առաջադրել է իր թեկնածությունը, սակայն հետո հանել է՝ աջակցելով դեմոկրատների մյուս թեկնածուին՝ Բարաք Օբամային: