Ավտոմատավոր ոստիկաններ՝ Կոտայքի մարզի ճանապարհներին

Արդեն հայտնել ենք, որ այսօր Նոր Գեղիում զինված միջադեպ է գրանցվել ավազակային հարձակման փորձ կատարող խմբի մասնակցությամբ:   Խմբի անդամներից երկուսին հայտնաբերելու նպատակով  ոստիկանությունն ակտիվ օպերատիվ-որոնողական աշխատանքներ է սկսել, հատկապես` Կոտայքի մարզում:

Yerkir.am-ի տեղեկություններով՝  այս պահին  մարզի ավտոճանապարհներին ծառայություն են իրականացնում ավտոմատավոր ոստիկաններ, ովքեր ստուգում են կասկածելի թվացող մեքենաները: Նրանք, ամենայն հավանականությամբ, փնտրում են փախուստի դիմածների ավտոմեքենան:

Հիշեցնենք, որ այսօր` ժամը 10-ի սահմաններում, երեք անհայտ անձինք փորձել են մուտք գործել Բյուրեղավան քաղաքի թիվ 7 շենքի բնակարաններից մեկը: Ըստ նախնական տեղեկությունների՝ տանտիրուհին, ներսից դուռը կողպելով, զանգահարել է ամուսնուն, որը շտապել է տուն և, շենքի բակում հանդիպելով հիշյալ անձանց, պարզաբանում է պահանջել, ինչը վերածվել է վիճաբանության, և եռյակից մեկը ատրճանակն ուղղել է տանտիրոջ վրա, ապա հիշյալ անձինք ավտոմեքենայով դիմել են փախուստի:

Բնակարանատերը անմիջապես օգնության է կանչել ընկերոջը, և նրանք իրենց մեքենայով սկսել են հետապնդել փախչողներին: Աբովյան-Նորի Գեղի ավտոճանապարհի 3-րդ կիլոմետրին եռյակից նույն անձը իջել է մեքենայից, կրկին զենքը պահել հետապնդողների վրա, ինչից հետո քաշքշուկ է սկսվել, որի ընթացքում հնչել են կրակոցներ, ինչի արդյունքում նրան ու բնակարանատիրոջը պատճառվել են հրազենային վնասվածքներ: Ահազանգով մեկնած օպերատիվ խումբը հիշյալ վայրում հայտնաբերել է ինքնաշեն թմբուկավոր ատրճանակ՝ լիցքավորված վեց փամփուշտով, որոնցից երկուսը՝ կրակված, և մեկ բջջային հեռախոս: Փախուստի դիմածների ավտոմեքենայի պատկանելությունը պարզված է:

Ձեռնարկվում են անհրաժեշտ օպերատիվ-հետախուզական և որոնողական աշխատանքներ հանցագործություն կատարելու մեջ կասկածվող մյուս երկուսի ինքնությունը ճշտելու և նրանց հայտնաբերելու ուղղությամբ: Նշանակվել է դատաբժշկական փորձաքննություն: Կատարվում է քննություն: