Դատախազությունը կուղեկցի մեկ պատգամավորի և մեկ ցուցարարի՝ այցելելու Պերմյակովին

Շիրակի թեմի առաջնորդ Միքայել եպիսկոպոս Աջապահյանը հորդորեց ցուցարարներին գնալ տուն, և միայն այդ ժամանակ ինքը կմիջնորդի դատախազին` ազատ արձակել բոլոր բերման ենթարկվածներին: Ըստ սրբազանի` այս պահին կան 14 բերման ենթարկվածներ և 13 վիրավոր, որոնցից մեկի վիճակը ծանր է:

Գյումրեցի պատգամավոր Մարտուն Գրիգորյանը նույնպես ցուցարարներին ասաց, որ խոսել է գլխավոր դատախազի հետ: Մարտուն Գրիգորյանը ցուցարարներից մեկի հետ գնալու է ռուսական ռազմաբազա՝ համոզվելու՝ մարդասպանը Գյումրիո՞ւմ է, թե՞ ոչ:

Հնարավորության դեպքում կնկարահանեն ոճրագործության մեջ մեղադրվողին, որպեսզի ցուցադրեն այն ցուցարարներին: Ըստ Մարտուն Գրիգորյանի` բերման ենթարկվածներից 2-ը ազատ են արձակվելու և միանալու են ցուցարարներին:

Իսկ մեղադրյալին այցելելուց հետո կշարունակվեն բանակցությունները դտախազության հետ՝ մյուս բերման ենթարկվածներին ազատ արձակելու համար: