Մինչ պատգամավորներն առաջարկում են գրավոր դիմել իրենց, հասարակ քաղաքացիներն արդեն օգնություն են տրամադրում 12 երեխաների մորը

Yerkir.am-ը գրել էր, որ հինգշաբթի օրը իր վեց մանկահասակ երեխաների հետ կառավարության շենքի մոտ բողոքելու էր եկել Շենգավիթ համայնքի բնակչուհի` 12 երեխաների մայր Արմենուհի Մանուկյանը: Տեսանյութը` այստեղ:

Արմենուհի Մանուկյանը  նշում էր, որ դիմել է պատկան մարմիններին, որ օգնեն, հագուստ տրամադրեն, որպեսզի երեխաները դպրոց հաճախելու համար հագուստ ունենան, սակայն խոստացված օգնությունը ուշանում է, իսկ երեխաները հագուստ չունենալու պատճառով արդեն 2 ամիս է` դպրոց չեն հաճախում:

Yerkir.am-ը հետաքրքրվեց խորհրդարանական ճեպազրույցներին մասնակցող` Շենգավիթ համայնի բնակիչ,  ՕԵԿ-ական պատգամավոր Լևոն Դոխոլյանից, թե տեղյա՞կ է, արդյոք, այդ ընտանիքից և կարո՞ղ է օգնել ինչ-որ բանով:

Լևոն Դոխոլյանը նախ նշեց, թե ԱԺ-ում քննարկվող յուրաքանչյուր օրենք սոցիալական հուզումների առիթ է դառնում, և մարդիկ իրենց բողոքի ձայնն են բարձրացնում թե' կառավարության շենքի և թե' ԱԺ շենքի առաջ: Հետո նշեց, որ տվյալ ընտանիքի մասին ինֆորմացիա չունի և չի կարող պատասխանել:

Մեր հարցին` կարո՞ղ է ինչ-որ բանով օգնել, ՕԵԿ-ական պատգամավորը պատասխանեց. «Մեզ չեն դիմել, ինձ, համենայն դեպս, չեն դիմել»:

ՕԵԿ-ական պատգամավոր Մհեր Շահգելդյանն էլ այսպես պատասխանեց. «Թող գրավոր դիմեն մեզ, մեր ուժերի շրջանակում կփորձենք աջակցել: Իհարկե, դա խայտառակ փաստ է, մենք կփորձենք մեր հնարավորությունների շրջանակում աջակցել: Նոր խոսում էինք դեմոգրաֆիական խնդիրների մասին. եթե ընտանիքն ունի 12 երեխա, այդ ընտանիքը, միանշանակ, աջակցության կարիք ունի»:

Ի դեպ, տեսանյութի հրապարակումից հետո` երկու-երեք օրվա ընթացքում, տասնյակ քաղաքացիներ դրամ և հագուստ են հավաքել, որպեսզի օգնեն այդ ընտանիքին: Նաև աշխարհի տարբեր երկրներում բնակվող մի քանի մեծահարուստ հայեր ցանկություն են հայտնել աջակցել այդ ընտանիքին: