Գողացած անվադողը` ձեռքին, դեզոմորֆինը՝ գրպանում

Ոստիկանության Մալաթիայի բաժնի ծառայողները, օրերս Օհանովի փողոցի թիվ 24 շենքի մոտ նկատելով մի քաղաքացու՝ ձեռքին անվադող, գողություն կատարելու կասկածանքով բերման էին ենթարկել բաժին: Ինքնությունը պարզելուց հետո (1985 թ. ծնված Եղիշե Ա.-ն էր), երբ խուզարկել էին գրպանները, 5 մլ-անոց ներարկիչ էր հայտնաբերվել՝ 2 մլ մուգ շագանակագույն հեղուկանման զանգվածով: Նա հայտնել էր, որ զանգվածը «դեզոմորֆին» տեսակի թմրամիջոց է, իսկ անվադողն էլ վաղ առավոտյան` ժամը 05.30-ի սահմաններում, գողացել է Անդրանիկի փողոցի թիվ 22 շենքի մոտ կայանված «ԳԱԶել»-ից:

Ոստիկանները հայտնաբերել են ավտոմեքենայի վարորդին և նրանից հաղորդում ընդունել, ըստ որի՝ իրեն պատճառված նյութական վնասի չափը կազմում է 30.000 դրամ:

Թմրամիջոցն ուղարկվել է փորձաքննության: Կատարվում է հետաքննություն: