Գրագողության քանի՞ դեպք է գրանցվել Հայաստանում

Ոստիկանության աշխատակիցների կողմից 2011-2014թթ. 9 ամիսների ընթացքում ձեռնարկված միջոցառումների արդյունքում ՀՀ քրեական օրենսգրքի 158,159,197 հոդվածի հատկանիշներով բացահայտվել է 75 դեպք, որոնցից 49-ը` 158-րդ հոդվածի (հեղինակային և հարակից իրեվունքները խախտելը), 22-ը` 197-րդ հոդվածի (ապրանքային նշանն ապօրինի օգտագործելը) և 4-ը` 159-րդ հոդվածի (արտոնագրային իրավունքը խախտելը) հատկանիշներով: Այսօր լրագրողների հետ հանդիպման ժամանակ այս վիճակագրությունը ներկայացրեց ՀՀ ոստիկանության կազմակերպված հանցավորության դեմ պայքարի գլխավոր վարչության 1-ին վարչության 5-րդ բաժնի պետ, ոստիկանության փոխգնդապետ Արթուր Վարդերեսյանը:

Նա նշեց, որ ոստիկանությունն ակտիվ մասնակցում է մտավոր սեփականության ոլորտում բարեփոխումների գործընթացին՝ իրականացնելով օրենսդրության կատարելագործմանն ու ոստիկանության ծառայողների մասնագիտական հմտությունների բացահայտմանն ուղղված միջոցառումներ:

«Մտավոր ոլորտն առավել պաշտպանված դարձնելու նկատառումով ոստիկանության կողմից մշակվել է «ՀՀ քրեական օրենսգրքում փոփոխություններ կատարելու մասին» օրենքի նախագիծը, որն արդեն քննարկվել է Հայաստանի Հանրապետության պետական-իրավական հարցերով հանձնաժողովում եւ ոստիկանությունում լրամշակվելուց հետո կուղարկվի Ազգային ժողով»,- ասաց Վարդերեսյանը:

Նրա խոսքով` գրագողության դեպքեր հիմնականում գրանցվում են  բուհական դասագրքերում: Առանձին հեղինակներից նման խնդիրով իրենց դիմել է Ալբերտ Նալչաջյանը: