Հայաստանն ունի շատ լավ բռնցքամարտիկներ. Բելառուսի հավաքականի մարզիչ

Հայաստանում ուսումնամարզական հավաք անցկացնող` բռնցքամարտի Բելառուսի  հավաքականը Երևանի «Դինամո» մարզադահլիճում հերթական սպարինգ մենամարտն անցկացրեց բռնցքամարտի Հայաստանի հավաքականի հետ, ինչից հետո Հայաստանի բռնցքամարտի ֆեդերացիայի մամուլի ծառայությունը զրուցել է երկու հավաքականների մարզիչների հետ:

Բելառուսիայի հավաքականի գլխավոր մարզիչ Կոնստանտին Սոկոլովը նշել  , որ այս ուսումնամարզական հավաքն ու սպարինգներն իր սաների համար շատ օգտակար էին:

- Մենք եկել էինք Հայաստան, որպեսզի մեր բռնցքամարտիկների ֆունկցիոնալ վիճակը ստուգենք լեռներում: Մենք մեզ հետ բերել ենք բժիշկ, ով անմիջապես մարզումներից հետո հետազոտում է բռնցքամարտիկներին: Պետք է ասեմ, որ Ծաղկաձորի լեռները հրաշալի տեղ են մարզվելու համար, և դա արդեն իսկ արտացոլվում է մեր բռնցքամարտիկների մարզավիճակում: Մենք այստեղից կհեռանանք լավ ֆունկցիոնալ պատրաստվածությամբ և կսկսենք աշխատանքներ տանել տեխնիկատակտիկական որակները բարելավելու ուղղությամբ: 

Սոկոլովը նաև նշեց, որ տպավորված է հայ բռնցքամարտիկներով: 

- Դուք ունեք շատ լավ բռնցքամարտիկներ, մեծ ձգտումով ու ցանկությամբ: Ես այս երկու սպարինգների ընթացքում չտեսա մի բռնցքամարտիկի, ով գլուխ պահեր, իսկ աշխատասիրությունն ամենակարևոր գործոններից է: Պարզից էլ պարզ է, որ հայ բռնցքամարտիկներին մեծ ապագա է սպասվում:

Իր հերթին, Հայաստանի հավաքականի գլխավոր մարզիչ Դավիթ Թորոսյանը նշեց, որ սպարինգ մենամարտերն օգտակար էին նաև հայ բռնցքամարտիկների համար:

-Բելառուս բռնցքամարտիկների հետ սպարինգ մենամարտերը ցույց տվեցին, որ մեր տղաները լավ են պատրաստված թե՛ ֆիզիկապես, թե՛ տեխնիկապես: Մի քիչ  փորձի պակաս կա, բայց մենք դա կփորձենք լրացնել հենց նմանատիպ սպարինգ մենամարտերով ու միջազգային մրցաշարերով:

Տեղեկացնենք, որ հայ բռնցքամարտիկների առաջիկա մրցելույթը Վաչիկ Մկրտչյանի անվան մրցաշարն է, որը տեղի կունենա նոյեմբերի 18-23-ը «Դինամո» մարզադահլիճում: