ԼՂՀ նախագահը եղել է Թոնդիրգետի ոսկու հանքավայրում

Նախագահ Բակո Սահակյանը հոկտեմբերի 27-ին այցելել է հանրապետության հարավային թեւ:

Նախագահը ներկա է գտնվել Կովսական քաղաքում նոր մանկապարտեզի բացման հանդիսավոր արարողությանը: Երկրի ղեկավարը նշել է, որ նախադպրոցական կրթության ոլորտը մշտապես գտնվում է իշխանությունների ուշադրության կենտրոնում, եւ այսուհետ էլ կարվի հնարավորը դրա շարունակական զարգացման համար:

Կովսականում նախագահ Սահակյանը մասնակցել է նաեւ ժամանակակից սարքավորումներով վերազինված եւ կապիտալ վերանորոգված տեղամասային հիվանդանոցի բացման արարողությանը: Նախագահը նշել է, որ արդի պայմաններին համապատասխանող բժշկական հաստատությունների առկայությունը շրջաններում հանդիսանում է առողջապահության զարգացման հայեցակարգային ուղղություններից մեկը, եւ այս ոլորտում պետությունը շարունակելու է իրականացնել լայնածավալ ծրագրեր:

Նույն օրը երկրի ղեկավարը եղել է Թոնդիրգետի ոսկու հանքավայրում, ծանոթացել այնտեղ իրականացվող աշխատանքներին եւ առկա խնդիրներին: Նախագահ Սահակյանը կարեւորել է լեռնահանքարդյունաբերական ճյուղի նշանակությունը հանրապետության կյանքում` այն համարելով Արցախի սոցիալ-տնտեսական զարգացման հիմնարար ուղղություններից մեկը:

Նախագահը երախտագիտություն է հայտնել սփյուռքահայ բարերար Վարդան Սերմաքեշին այս ռազմավարական ծրագիրը կյանքի կոչելու համար` այն որակելով որպես Հայրենիք-Սփյուռք համագործակցության ու հայրենասիրության լավագույն դրսեւորումներից: Նախագահին ուղեկցել են վարչապետ Արա Հարությունյանը, պաշտոնատար այլ անձինք: