Հայ պրոֆեսիոնալ բռնցքամարտիկ Սաշա Ենգոյանը վաղը կպայքարի աշխարհի չեմպիոնի տիտղոսի համար

Հայ պրոֆեսիոնալ բռնցքամարտիկ՝ բելգիաբնակ Սաշա Ենգոյանը վաղը՝ սեպտեմբերի 3-ին կպայքարի WBF վարկածով աշխարհի չեմպիոնի տիտղոսի համար:

Yerkir.am-ի հետ զրույցում  29-ամյա բռնցքամարտիկը պատմեց մարզաձևում իր առաջին քայլերի  և վաղը կայանալիք մենամարտի մասին.

«12 տարեկանից սկսել եմ զբաղվել բռնցքամարտով: Այդ ժամանակ ապրում էինք Գյումրիում: Դպրոցն ավարտելուց հետո ընդունվեցի մանկավարժական համալսարան և դադարեցի բռնցքամարտով զբաղվել:  2 տարի համալսարանում սովորելուց հետո տեղափոխվեցի Իսպանիա, քանի որ ծնողներս այնտեղ էին:   Սկզբնական շրջանում այնքան էլ լուրջ չէի վերաբերվում, քանի որ Իսպանիան բոքսի երկիր չէ, սակայն, մասնակցելով սիրողական մրցաշարերի, կարողացա լուրջ արդյունքներ գրանցել:   Այնուհետև ծանոթացա իմ ներկայիս մենեջերի հետ, ով  ազգությամբ բելգիացի է: Նա  մենամարտեր էր կազմակերպում և  ինձ խորհուրդ տվեց, որ կարիերաս շարունակեմ պրոֆեսիոնալ բռնցքամարտում:   2009 թվականին անցկացրեցի առաջին մենամարտս: Այդ ժամանակ Իսպանիայում էի, իսկ   2012-ին տեղափոխվեցի Բելգիա:  Բելգիացիներն այստեղ ինձ ճանաչում են, և իմ մենամարտերին ներկա է լինում շուրջ 5000 հանդիսական:

Խոսելով վաղվա մենամարտի մասին` Ենգոյանն ասաց. «Ինձ համար շատ կարևոր  մենամարտ է, քանի որ հակառակորդս  WBF վարկածով աշխարհի չեմպիոն՝ բրազիլացի Անդերսոն Կլեյտոն Դոս-Սանթոսն է, ով անցկացրել է  50 մենամարտ, որոնցից 42-ում հաղթել է մրցակիցներին՝  36-ը նոկաուտով»:  

Հայ բռնցքամարտիկը նաև նշեց, որ ցանկանում է վերադառնալ Հայաստան և հեռակա շարունակել ուսումը,  իսկ հաջորդ տարի Ցեղասպանության 100-րդ տարելիցի կապակցությամբ ռինգ դուրս կգա մարզահագուստով, որի վրա  գրված կլինի 100:

Տեղեկացնենք, որ Ենգոյանը մասնակցել է Հայաստանի երիտասարդական առաջնությանը և գրավել 3-րդ հորիզոնականը: 15 տարեկանում հռչակվել է Շիրակի մարզի բացարձակ չեմպիոն:  Պրոֆեսիոնալ բռնցքամարտիկի կարիերայում անցկացրել է 30 մենամարտ, որոնցից 29-ում հաղթանակ է տոնել և կրել 1 պարտություն: 19  մենամարտում հակառակորդներին հաղթել է նոկաուտով:     

Երվանդ Հակոբյան