«Դո՛ւրս մեր գրպանից» շարժումը քաղաքացիական անհնազանդություն կդրսևորի

Վարորդների շահերը պաշտպանող «Դո՛ւրս մեր գրպանից» նախաձեռնության անդամներն  ավտոերթեր կկազմակերպեն այնքան ժամանակ մինչեւ պատկան մարմիններն ուշադրության չարժանացնեն իրենց բարձրացրած խնդիրները:

Նախաձեռնությունը, որն ունի 20 անդամ, 4 պահանջ է ներկայացնում`

1. վերացնել կարմիր գծանշանները,

2. 5 անգամ կրճատել տեսախցիկների և արագաչափերի տուգանքները,

3. մինչ այժմ գրանցված տուգանքների վրա եկած տույժերի նկատմամբ հայտարարել համաներում,

4. դադարեցնել բոլոր տեսակի տուգանքները մինչև նոր կանոնակարգի հաստատվելը:

Նախաձեռնության անդամ Արսեն Պետրոսյանի խոսքով` իրենց պահանջները մինչ օրս ուշադրության չեն արժանացել:  Ըստ նրա` իրենց միացած` Ավտովարորդների պաշտպանության լիգան այժմ համագործակցում է ոստիկանության հետ, նրանց հետ քննարկումներ տանում, սակայն իրենք որևէ մարմնի հետ մինչ այժմ քննարկում չեն ունեցել: Խմբի անդամները հավաստիացնում են, որ նախաձեռնությունն ինքնաբուխ է և որևէ մեկի կողմից ուղղորդված չէ: Նրանք նշում են, որ եթե իրենց պահանջներն ուշադրության չարժանանան` կդիմեն այլ միջոցների` ընդհուպ մինչև քաղաքացիական անհնազանդություն:

«Դո՛ւրս մեր գրպանից» նախաձեռնության հաջորդ ակցիան նախատեսված է հունիսի 10-ին: