Քառյակի դիրքորոշումը բյուջեի կատարողականի քվեարկության վերաբերյալ հայտնի է

Ազգային ժողովում չորս ոչ իշխանական խմբակցությունների` ՀՅԴ-ի,ՀԱԿ-ի, ԲՀԿ-ի եւ «Ժառանգության» դռնփակ նիստից հետո ԲՀԿ խմբակցության քարտուղար Նաիրա Զոհրաբյանը լրագրողների հետ զրուցում ասաց, որ իրենք նախորդ նիստում պայմանավորվել էին, որ չորս քաղաքական ուժերը պետք է ներկայացնեն այն լրջագույն խնդիրները, որոնք, ըստ իրենց, ծառացած են մեր երկրի առաջ:

«Քառյակը խմբակցությունների կողմից ներկայացված խնդիրները համարել է հրատապ լուծում պահանջող և ոչ իշխանականների ներկայացրած խնդիրների փաթեթ է պատրաստվում ներկայացնել կառավարությանը»,- ասաց պատգամավորը և հավելեց, որ քառյակի հաջորդ նիստում հրատապ լուծում պահանջող խնդիրների վերաբերյալ հայտարարությամբ հանդես կգան:

Զոհրաբյանն ասաց, որ քննարկել են նաև կառավարության բյուջեի կատարողականը և որոշում կայացրել միասնական դեմ քվեարկել կառավարության բյուջեի կատարողականին: «Անցյալ անգամ դեմ էինք քվեարկել բյուջեի ընդունմանը, այս անգամ էլ դեմ ենք քվեարկելու»,- ասաց նա:

Քառյակն այսօր քննարկել է նաև կառավարության ծրագրի ժամանակ մեկը մյուսի փոխարեն քվեարկող պատգամավորների հարցը և որոշում կայացրել այդ խնդրի լուծման վերաբերյալ օրինագիծ ներկայացնել Ազգային ժողով: