Փոլ Մաքքարթնին հոսպիտալացվել է

Տոկիոյում վիրուսային ինֆեկցիայով հոսպիտալացվել է աշխարհահռչակ երաժիշտ, նախկին The Beatles խմբի անդամ Փոլ Մաքքարթնին: Այս մասին հայտնում է lenta.ru-ն: 71-ամյա Մաքքարթնին չեղյալ է հայտարարել Ճապոնիայում և Հարավային Կորեայում նախատեսված համերգային շրջագայության մնացած ելույթները:

Անցյալ շաբաթ Մաքքարթնին երկրպագուներից ներողություն էր խնդրել մի շարք համերգներ հետաձգելու համար: Դրանից հետո նրա առողջական վիճակը զգալիորեն վատացել է:

«Ցանկանում եմ շնորհակալություն հայտնել իմ լսարանին սիրո, աջակցության և ըմբռնման համար: Հուսով եմ՝ շուտով կհանդիպեմ բոլորիդ հետ»,- ասվում է Մաքքարթնիի հայտարարության մեջ:

Փոլ Մաքքարթնին շրջագայության ընթացքում Ճապոնիայում համերգներ պետք է տար մայիսի 17-24-ը, Հարավային Կորեայում՝ մայիսի 28-ին: Բացի դրանից՝ նա ԱՄՆ-ում ունի ծրագրված 19 ելույթ, որոնց հետաձգվելու մասին տեղեկատվություն դեռ չկա: