Մերկելն, իրոք, կոշտ է խոսել Էրդողանի հետ

Փետրվարի սկզբին Թուրքիայի վարչապետ Ռեջեփ Թայիփ Էրդողանի` Բեռլին այցելության ժամանակ Գերմանիայի կանցլեր Անգելա Մերկելը Էրդողանին կոչ էր արել առերեսվել սեփական պատմության հետ: Այս մասին գրել էր միայն թուրքական Hurriyet-ը, իսկ գերմանական ԶԼՄ-ները լռում էին, ինչի պատճառով մենք լուրի իսկությունը կասկածի տակ առանք` չբացառելով, որ տեղեկատվության այս արտահոսքը հատուկ նպատակ է հետապնդում:

Հիշեցնենք, որ 2015թ.-ին Հայոց ցեղասպանության 100-ամյա տարելիցն է, իսկ մոտ ժամանակներս Թուրքիայում սպասվում են ընտրություններ, և Էրդողանը փորձում է այս կերպ ցույց տալ, թե ինչպիսի ճնշումների տակ է հայտնվել ինքը: Այնուամենայնիվ, ինչպես ասում են, առանց կրակի ծուխ չի լինում. Թուրքիայի վարչապետը, իրոք, այսօր հայտնվել է ծանր կացության մեջ` թե' առաջիկա ընտրությունների և թե' Հայոց ցեղասպանության 100-ամյա տարելիցի առիթով կազմակերպվելիք բազմաբնույթ միջոցառումների տեսանկյունից: Եվ Թուրքիան` ի դեմս Էրդողանի, հայտնվել է ծանր ճնշումների տակ:

Yerkir.am-ին այսօր հայտնի դարձավ, որ նման խոսակցություն Մերկելի եւ Էրդողանի միջեւ, իրոք, եղել է: Մերկելը խիստ տոնով, նույնիսկ` կոշտ բառապաշարով Էրդողանին կոչ է արել առերեսվել սեփական պատմության հետ և, բացելով Հայաստանի հետ սահմանը, կարգավորել հարաբերությունները Հայաստանի հետ: