Ինչո՞ւ են ԱԺ-ում տեսախցիկներ տեղադրվում համատարած

Մամուլն այսօր գրել է, որ երեկ խորհրդարանի միջանցքներում լայն թափով տեսախցիկների տեղադրման գործընթաց էր սկսվել։ «Թե ինչո՞ւ է խորհրդարանի ղեկավարությունը որոշել համատարած տեսախցիկներ տեղադրել ԱԺ միջանցքներում եւ որքան արժե այդ «հաճույքը», դեռ հայտնի չէ»,- գրում է «Հայկական ժամանակ»-ը:

Yerkir.am-ը Ազգային ժողովի աշխատակազմի ղեկավար Գուրգեն Դումանյանից փորձեց ստանալ հարցի պատասխանը: Պարզվում է` ԱԺ-ում տեսախցիկներ տեղադրվում են անվտանգության նկատառումներով: Համենայն դեպս, այդպես մեր թղթակցի հետ զրույցում վստահեցրեց Դումանյանը: Նա նաեւ տեղեկացրեց, որ տեսախցիկներ տեղադրվելու են ինչպես շենքի ներսում, այնպես էլ ԱԺ ամբողջ տարածքում: Ըստ Դումանյանի` ֆինանսավորման բացակայության պատճառով մի քանի տարի հնարավոր չէր ապահովել անվտանգության համակարգի այդ կարեւոր բաղադրիչը, բայց հիմա համապատասխան գումարը հատկացվել է: