Շախմատի թիմային Եվրոպայի առաջնությունում Հայաստանի տղամարդկանց հավաքականը մնաց առանց մեդալի

Ավարտվել է Լեհաստանի մայրաքաղաք Վարշավայում ընթացող շախմատի Եվրոպայի առաջնությունը:

Համաշխարհային օլիմպիադայի և  աշխարհի գործող չեմպիոն, շախմատի Հայաստանի տղամարդկանց հավաքականը զբաղեցրեց 4-րդ հորիզոնականը՝ զրկվելով մեդալից:

Եվրոպայի առաջնության վերջին՝ 9-րդ տուրում մեր տղաները ոչ ոքի խաղացին Ադրբեջանի հավաքականի հետ՝ 2:2: Այդ արդյունքն էլ գործնականում զրկեց նրանց մեդալից: Հայաստանի հավաքականը մրցաշարն ավարտեց 13 միավորով:

Նույնքան միավոր ունեն նաև  2-3-րդ տեղերը բաժանող Ռուսաստանի և Ֆրանսիայի հավաքականները, որոնք Հայաստանից առաջ անցան լրացուցիչ ցուցանիշներով: Ֆրանսիան երկրորդն է, Ռուսաստանը՝  երրորդը:

Հայաստանի հավաքականի կազմը՝ Լեւոն Արոնյան, Սերգեյ Մովսեսյան, Վլադիմիր Հակոբյան, Գաբրիել Սարգսյան և  Տիգրան Պետրոսյան:

 Շախմատի Հայաստանի կանանց հավաքականը 5-րդն է:

Հիշեցնենք, որ Եվրոպայի թիմային առաջնությունը մեկնարկել էր նոյեմբերի  8-ին:

Շախմատի Հայաստանի տղամարդկանց հավաքականը նույն կազմով  կմասնակցի նոյեմբերի 24-ից դեկտեմբերի 6-ը Անթալիայում կայանալիք  աշխարհի թիմային առաջնությանը:

Հայաստանի հավաքականի մրցակիցներն են  Ռուսաստանի, Ուկրաինայի, ԱՄՆ-ի, Հոլանդիայի, Թուրքիայի, Գերմանիայի, Չինաստան, Եգիպտոսի եւ Ադրբեջանի հավաքականները:

Հիշեցնենք, որ Հայաստանի շախմատի հավաքականը աշխարհի գործող չեմպիոնն է: