Արտավազդ Փելեշյանին կշնորհվի ″Եղիցի լույս″ մրցանակը

Այս տարի «Ոսկե ծիրան» կինոփառատոնի «Եղիցի լույս» մրցանակը կշնորհվի Արտավազդ Փելեշյանին. լրագրողների հետ զրույցում նշեց կինոփառատոնի հիմնադիր տնօրեն Հարություն Խաչատրյանը:

Ըստ նրա` Փելեշյանը հայ կինոարվեստում առաջին մարդն է, ով արժանի է այս մրցանակին:

«Մրցանակը կտրվի Մայր Աթոռ Սուրբ Էջմիածնում: Փելեշյանը նաեւ խոստացել է, որ մեկ հանդիպում կունենա լրագրողների հետ»,-ասաց Խաչատրյանը:

Գեւորգյան ճեմարանի տեսուչ Գեւորգ եպիսկոպոս սրբազանն էլ նշեց, որ հայ եկեղեցու մասնակցությունը կինոփառատոնին արդեն 6 տարվա պատմություն ունի: Ըստ նրա` ընտրություն կատարելը դժվար է, սակայն Փելեշյանն իսկապես արժանի է այս մրցանակին:

Երեկ կինոփառատոնի շրջանակներում Հայաստան են ժամանել Արտավազդ Փելեշյանն ու Շառլ Ազնավուրը: Հարցին, թե արդյո՞ք Ազնավուրը կհանդիպի լրագրողների հետ, Խաչատրյանը պատասխանեց` ոչ, ստիպված ենք լինելու վայելել միայն նրա ներկայությունը: