Պատգամավորները ստիպված կլինեն ԱԺ առաջիկա նիստին էլ դիմանալ տոթին

Արդեն մի քանի օր է՝ ՀՀ Ազգային ժողովի շատ պատգամավորներ «Ժողովուրդ»-ին դժգոհում են, որ ԱԺ նիստերի դահլիճում տոթ է, և գրեթե անհնար է աշխատել:

Բանն այն է, որ ԱԺ-ի օդորակիչները չեն աշխատում ամառվա այս շոգ եղանակին. նշում է թերթը: Ու երեկ, երբ ԱԺ հարցուպատասխանի ժամանակ պատգամավորներին «միացան» նաև ՀՀ կառավարության անդամները, ներսում շնչելու օդ չկար: Ու նիստն ընթացավ «բաց դռների» միջավայրում:

Երեկ «Ժողովուրդ»-ը փորձել է ԱԺ աշխատակազմի ղեկավար Գուրգեն Դումանյանից պարզել, թե երբ է լուծվելու օդորակիչների խնդիրը.

«Համաշխարհային բանկի մեր գործընկերները գրանտային միջոցներ տրամադրեցին, արդեն մրցույթը եղել է: Հաղթող կազմակերպությունը բերում է համապատասխան սարքավորումները, երևի մինչև սեպտեմբեր արդեն օդափոխության նոր համակարգը նիստերի դահլիճում կաշխատի»:

Այսպիսով՝ եզրափակում է «Ժողովուրդը», պատգամավորները ստիպված կլինեն ԱԺ առաջիկա արտահերթ նիստին էլ դիմանալ տոթին: