Օրվա երկրորդ կեսին նորատեսակ ընտրախախտումներ են սպասվում

Երևանի ավագանու ընտրություններում օրվա առաջին կեսին գրանցվել են արդեն ավանդական դարձած ընտրախախտումները, տեղեկություն կա, որ երկրորդ կեսին կկիրառվեն նաև որոշ նորամուծություններ. «Մեդիա կենտրոն»-ին հայտնել է ԲՀԿ խորհրդարանական խմբակցության քարտուղար Նաիրա Զոհրաբյանը:

Նրա տեղեկությամբ` նկուղային հարկերում տեղակայված մի շարք ընտրատեղամասեր քվեարկության ընթացքում հոսանքազրկվել են: Դրանց թվում են, մասնավորապես, 13/26 և 10/01 տեղամասերը, երկրորդում երկու ժամից ավելի լույս չի եղել:  Բացի դրանից` Նար-Դոսի փողոցում գտնվող թիվ 75 դպրոցում տեղակայված 9/1, 9/2, 9/3 և 9/4 տեղամասերի կից տարածքում ինչ-որ անձինք ընտրողներին բաժանել են կանաչ գույնի գրիչներ, նրանց դրդել հենց այդ գրիչներով քվեաթերթիկներում նշումներ կատարել և այնուհետև վերադարձնել գրիչները` կրկին բաժանելու համար:

Նաիրա Զոհրաբյանն ականատես է եղել նաև, որ մայրաքաղաքի թիվ 114 դպրոցի տարածքում շրջում են «ակտիվ երիտասարդներ, որոնք փորձում են կողմնորոշել ընտրողներին»: Ընդ որում` տեղամասը հսկող ոստիկանը ոչ միայն չի հեռացրել այդ երիտասարդներին տեղամասից 50 մ շառավղով, ինչպես դա պահանջում է Ընտրական օրենսգիրքը, այլև մտերմիկ զրուցել է նրանց հետ: