Ամերիկացիների մեծամասնությունը դեմ է Սիրիայի պատերազմին միջամտելուն

Ամերիկացիների մեծամասնությունը հավանություն չի տալիս Սիրիայի քաղաքացիական պատերազմին միջամտելուն: Դա են վկայում սոցիոլոգիական հարցումները, որոնք համատեղ իրականացրել են Reuters-ը եւ Ipsos-ը ապրիլի 26-ից մայիսի 1-ը:

Հարցվածների 61 տոկոսը դեմ է ԱՄՆ ինտերվենցիային: Հակառակն է ցանկանում 10 տոկոսը: Սակայն այն դեպքում, երբ Դամասկոսը քիմիական զենք կիրառի այդ թիվը կհասնի 27 տոկոսի: Բայց 44 տոկոսը, միեւնույն է, դեմ է միջամտությանը:

Հարցումներից պարզվել է, որ ամերիկացիների մի ստվար զանգված չի հետեւում Սիրիայում կատարվող իրադարձություններին. 36 տոկոսը խոստովանել է, որ ոչինչ չգիտի Սիրիայի պատերազմի մասին: Իրադարձություններին ակտիվորեն հետեւում է 8 տոկոսը:

ԱՄՆ նախագահ Բարաք Օբաման պատրաստակամություն է հայտնել միջամտել Սիրիայի իրադարձություններին միայն այն դեպքում, երբ անհերքելի փաստեր լինեն այդ երկրում զանգվածային ոչնչացման զենքի կիրառման մասին: Ի դեպ, Սիրիայի նախագահ Բաշար Ասադի հակառակորդները համարյա ամեն շաբաթ հայտարարում են, թե կառավարությունը քիմիական զենք է կիրառել, սակայն այդ տեղեկատվությունը դեռեւս ոչ մի անգամ չի ապացուցվել: