Նոր աղմկոտ գործ` բարձրաստիճան ոստիկանների մասնակցությամբ

Ոստիկանության` «Հայկական ժամանակի» աղբյուրները հայտնում են, որ մի քաղաքացի այս տարվա ապրիլի 9-ին Երևանի Արաբկիրի ոստիկանություն հաղորդում է տվել հանցագործության մասին, որի շարունակությունը, ամենայն հավանականությամբ, աղմկոտ է լինելու:

Ըստ հաղորդման` Հայաստանում ստեղծվել է ապօրինի ֆինանսական բուրգ, որը քաղաքացիներից խաբեությամբ գումարներ է կորզել ու «սկել»: Այդպիսի մեծ ու փոքր կառույցներ Հայաստանում էլի կան, բայց այս մեկը ստեղծվել և ղեկավարվում է ՀՀ բարձրաստիճան մի քանի ոստիկանների կողմից: Կառույցի «շրջանառությունը» եղել է մի քանի միլիոն դոլար:

Երեկ ՀՀ ոստիկանության լրատվական ստորաբաժանումից հաստատեցին, որ թերթի նշած հանցագործության մասին հաղորդումը ընդունվել և ուսումնասիրվում է: Այս գործը այնքան աղմկոտ է լինելու և այնպիսի անուններ են շոշափվում, որ ոստիկանությունը ամեն ինչ անելու է` այն կոծկելու համար: Մանրամասները՝ առաջիկայում: