Արգելել են Ալեքսանդր Վարպետյանի տեղաշարժը Հայաստանում

Արդեն երկու օր է՝ ֆրանսահայ անվանի ազգաբան և էաբան Ալեքսանդր Արորդի Վարպետյանը, ով ապրիլի 4-ին Ստամբուլից իր պոլսահայ ծանոթի հետ ժամանել է Երևան, մնացել է «Զվարթնոց» օդանավակայանի տարանցիկ գոտու հատուկ կացարանում. գրում է «Հայկական ժամանակը»: Սահմանապահ ծառայության աշխատակիցներն արգելել են նրա տեղաշարժը ՀՀ-ում` ասելով, որ նա Հայաստանի անվտանգության և հասարակական կարգի համար մեծ վտանգ է հանդիսանում:

«Հայկական ժամանակը» գրում է, որ չի բացառվում, որ ապրիլի 7-ին Վարպետյանը, որը հայրենիք էր ժամանել իր ծննդյան 70-ամյակը նշելու համար, ստիպողաբար լքի Հայաստանը: Երեկ գիշերը ԱԺ «Ժառանգություն» խմբակցության պատգամավորներ Զարուհի Փոստանջյանը և Ռուբիկ Հակոբյանը մեկնեցին օդանավակայան՝ բանակցություններ վարելու: Սակայն, ինչպես «ՀԺ» հետ հեռախոսազրույցում ասել է տիկին Փոստանջյանը, սահմանապահները պատգամավորների հետ չեն շփվում, պատասխանատու որևէ անձ չի ներկայանում:

Իսկ օդանավակայանում ծառայություն տանող ոստիկանները պատգամավորներին ասել են, որ միգուցե առավոտյան հնարավոր լինի մեկնումեկի հետ կապ հաստատել: Վարպետյանի հետ նույնպես տեսակցություն չի կայացել: Առաջացած խնդրի կապակցությամբ արդեն բաց նամակ է հղվել Սերժ Սարգսյանին, չնայած արձագանքի շանս գրեթե չկա, քանի որ Վարպետյանի մուտքը Հայաստան արգելվել է դեռևս 2002 թվականից…

Շարունակությունը կարդացեք «Հայկական ժամանակի» այսօրվա համարում…