Ապրիլի 9-ին Սերժ Սարգսյանը հանցագործներին հավաքելու է մի վայրում. Անդրեաս Ղուկասյան

Ընտրությունների կեղծելը հանցանք է, եւ այն հասնելու է իր ավարտին: «Կեղծիքների, հանցագործության մասնակիցները դեռ ժամանակ ունեն՝ մինչեւ ապրիլի 9-ը թույլ չտալու, որ հանցագործությունը շարունակվի: Այդ մարդկանց համար ներում-բեկում չի լինելու»,- Ազատության հրապարակում կազմակերպված հանրահավաքի ժամանակ հայտարարեց նախագահի նախկին թեկնածու Անդրեաս Ղուկասյանը եւ հավելեց. «Սերժ Սարգսյանը հավաքելու է մի տեղ բոլոր նրանց, ովքեր իր հետ միասին եղել են այդ հանցագործության մասնակիցները. բոլոր «մեխակները» հավաքելու է այդ զամբյուղի մեջ: Ժողովուրդն իրավունք ունի փակել նրանց այդ զամբյուղում, անել այնպիսի գործողություններ, որ չկարողանան այնտեղից դուրս գալ, մինչեւ չընդունեն ժողովրդի պահանջները»:

Անդրեաս Ղուկասյանը Րաֆֆի Հովհաննիսյանին ուղղված առաջարկով է հանդես եկել. «Դուք ունեք մեծ բանակ՝ կես միլիոնանոց, որը կարող է փոխել իրադրությունը ոչ միայն Հայաստանում, այլեւ տարածաշրջանում: Տվեք ինձ զինվորներ, ես պատրաստ եմ գլխավորել մարդկանց, որ «մեխակները» մնան այդ զամբյուղում: Մենք այդ օրը պետք է հաստատենք նոր Հայաստանը»: