Պիկետ` ի պաշտպանություն Ты кто такой, давай до свидания-ի հեղինակի

Բաքվի դատարանի առջեւ այսօր հերթական պիկետն է անցկացվել` ի պաշտպանություն թալիշ մտավորական, «Թալըշի սադո» թերթի գլխավոր խմբագիր Հալիլ Մամեդովի. տեղեկացնում է Regnum գործակալությունը: Ակցիային մասնակցել է մոտ 40 մարդ, որոնք պահանջել են բաց դատավարություն անցկացնել:

Դատարանի դահլիճում Մամեդովը, ի նշան բողոքի փակ դատալսումների դեմ, շարունակում է նստել դիմակով` դեմքով դեպի պատը:

Իրանի օգտին լրտեսություն կատարելու մեղադրանքով անցյալ տարվա հունիսի 21-ին ձերբակալված Մամեդովը  մեղադրվում է 3 հոդվածով` հայրենիքի դավաճանություն, ազգային եւ կրոնական պառակտման հրահրում, թմրանյութերի անօրինական պահում եւ տարածում: Նրան սպառնում է մինչեւ 15 տարվա բանտարկություն:

Միջազգային իրավապաշտպան եւ լրագրողական կազմակերպություններչը Մամեդովին ճանաչել են խղճի բանտարկյալ եւ բազմիցս պահանջել են ադրբեջանական իշխանություններից անհապաղ ազատ արձակել նրան:

Մամեդովին ձերբակալել են այն բանից հետո, երբ նա համացանցում տեղադրել է իր հեղինակած` հանրահայտ Ты кто такой, давай до свидания հոլովակը: