ՀՀԿ-ն վստահ չէ՞ Երեւանի ավագանու ընտրություններում իր հաղթանակին

Այն, որ Երեւանի ավագանու ընտրություններում ՀՀԿ համամասնական ցուցակի երկրորդ եւ երրորդ հորիզոնականներում Սմբատ Լպուտյանն ու Հովհաննես Թոքմաջյանն են, ԱԺ ՀՀԿ խմբակցության ղեկավար Գալուստ Սահակյանի համար ամենեւին էլ տարօրինակ չէ: Այսօր լրագրողների հետ հանդիպման ժամանակ նա հայտարարեց, որ Երեւանի ավագանու նոր կազմում տեսնում է մտավորականների մի շերտի, որը «կչափի եւ կձեւի լավ գաղափարները»:

Սահակյանը հայտարարեց, որ ինչպես նախագահի, այնպես էլ Երեւանի ավագանու ընտրություններում բոլորին համարում են ուժեղ մրցակիցներ: «Այնպես չէ, որ մենք Աստծո թեւերով եկել ենք եւ հրեշտակապետություն ենք ստեղծելու: Բոլորն էլ ուժեղ մրցակիցներ են, եւ ես շատ ողջունում եմ, որ ավելի համակարգված են գնում Երեւանի ավագանու առաջիկա ընտրությունները»,- նշեց նա:

Դիտարկմանը, թե հաղթանակի առումով այս անգամ ե՞ւս մտավախություն չունեն, Սահակյանը պատասխանեց, որ բոլոր ուժերն էլ ընտրության գնում են` հաղթանակի մասին մտածելով, հետո ավելացրեց. «Ժամանակից շուտ մենք մատ չենք թափ տալիս: Մենք գնում ենք այն ճանապարհով, որը որդեգրված է մեզ համար, կլինենք մեծամասնություն՝ կգործենք այդպես, կլինենք փոքրամասնություն՝ այդպես կգործենք, այսինքն` մեզ առաջնայինը քաղաքային իշխանությունը չի հետաքրքրում»:

Դիտարկմանն էլ, թե` նախագահական ընտրությունների այն վստահությունն ունե՞ն, որ բոլորը պետք է պայքարեն պատվավոր երկրորդ հորիզոնականի համար, քանի որ հաղթանակն իրենցն է, Սահակյանն արձագանքեց. «Նախ ես նման արտահայտություն չեմ արել, ով արել է` իրեն հարցրեք: Մեր մտավախությունը մի բանում կարող է լինել, որ այնպիսի ուժեր չտնօրինեն Հայաստանում, որոնք այլ կարծիք ունեն մեր ազգային ամբողջական համակարգի նկատմամբ: Մյուս բոլոր դեպքերում մենք որեւէ մտավախություն չունենք: Մենք մրցակիցներ ենք, մրցակցում ենք: Ի՞նչ մտավախություն, այ մտահոգություն ունենք, որ ավելորդ բաներ չարվեն, ավելորդ գրգռվածություն չառաջանա, որ ընտրությունները լինեն մրցակցային»: