ՄԱԿ-ի Անվտանգության խորհրդի նախագահությունը մարտի 1-ից անցել է Ռուսաստանին

ՄԱԿ-ի Անվտանգության խորհրդի նախագահությունը մարտի 1-ից անցել է Ռուսաստանին:

ՌԴ ԱԳՆ մամուլի ծառայությունը տեղեկացնում է, որ հիմնական ուշադրությունը սեւեռվելու է Աֆղանստանին եւ Կոսովոյին: Աֆղանստանի հարցով նիստը ծրագրված է մարտի 19-ին: Քննարկմանը կմասնակցեն ՄԱԿ-ի ԱԽ անդամ երկրների եւ Աֆղանստանի արտգործնախարարները:

Ռուսաստանը մտադիր է նաեւ զբաղվել մերձավորարեւելյան հակամարտությունների կարգավորմամբ: Մասնավորապես` քննարկվելու է Լիբանանի հարցով թիվ 1701 բանաձեւի իրագործումը, Գոլանի բարձունքներում իրադարձությունների զարգացման դինամիկան, իրադրությունը Իրաքում, Եմենում:

Կանցկացվեն նաեւ Կոսովոյին վերաբերող քննարկումներ:

Ինչ վերաբերում է Աֆրիկային, Ռուսաստանը նախատեսում է ուշադրությունը կենտրոնացնել Լիբիայի վրա, Հյուսիսային եւ Հարավային Սուդանների հակամարտությանը, Մալիի ճգնաժամին: