Հավաքում են ընտրության գնալ չցանկացողների ցուցակները

ՀՀ նախագահի թեկնածու Րաֆֆի Հովհաննիսյանի նախընտրական շտաբն այս օրերին ընտրախախտումների բազմաթիվ դեպքեր է արձանագրում: Այս շաբաթվա խախտումների ամփոփագիրն այսօր լրագրողների հետ հանդիպման ժամանակ ներկայացրեց «Ժառանգություն» կուսակցության մամլո խոսնակ Հովսեփ Խուրշուդյանը:

Համեմատելով նախորդ շաբաթվա ցուցանիշի հետ` նա նշեց, որ ընտրախախտումների թիվն աճել է: Այս անգամ ևս հայտաբերվել է խախտումների մոտ 30 դեպք, որոնցից մի քանիսով իրավապահ մարմիններն արդեն զբաղվում են:

Րաֆֆի Հովհաննիսյանի նախընտրական շտաբում տեղեկություն են ստացել, որ հավաքում են այն մարդկանց տվյալները, ովքեր հայտարարել են, որ չեն գնալու ընտրության:

Րաֆֆի Հովհաննիսյանի նախընտրական շտաբի իրավաբան-խորհրդատու Կարեն Մեջլումյանը ներկայացրեց խախտումներից մի քանիսը:

Նրա խոսքով` Շիրակի մարզի Ազատան գյուղում ՀՀ գործող նախագահի քարոզչական պաստառները փակցված են եղել ընտրատեղամասի վրա, որն անընդունելի է: Չթույլատրված վայրում պաստառներ են փակցվել նաև Արաբկիր վարչական շրջանում, մասնավորապես` գազի խողովակի վրա:

Բացի նմանատիպ դեպքերից, կան նաև դպրոցներում նախագահի օգտին քարոզչությունների տեսագրություններ, որոնցից հստակ երևում է, թե ինչպես են աշակերտներին հորդորում «ճիշտ ընտրություն» կատարել:

Մեջլումյանի խոսքով` նախորդ ընտրություների համեմատ, այյս անգամ ոստիկանությունը ընտրախախտումների վերաբերյալ ահազանգներին օպերատիվորեն է արձագանքում, ինչը դրական է, սակայն, ըստ նրա, դա  բավական չէ, ոստիկանությունն ինքը պետք է քայլեր ձեռնարկի խախտումները բացահայտելու համար, այլ ոչ թե սպասի, թե երբ իրենց կհայտնեն դրանց մասին: