Համաժողովից անտեղյակներին բերել էին արտահայտվելու

Քիչ առաջ Մելիք Ադամյան փողոցում գտնվող` ՀՀ կառավարության նիստերի դահլիճի մուտքի առջև հոծ բազմություն էր հավաքվել, գերակշիռ մասը` տղամարդիկ:

Հանրապետության տարբեր մարզերից և ԼՂՀ-ից հարյուրավոր քաղաքացիներ եկել էին մասնակցելու «Արցախ» հայրենակցական միության համաժողովին: Հետաքրքրական է, որ քաղաքացիներից ոչ ոք տեղյակ չէր, թե որն էր իրենց այդտեղ բերելու առիթը: Մի մասն ասում էր` ինչ-որ հանրապետականների ժողով է, մյուսներն ընդհանրապես չգիտեին` որտեղ են գտնվում:

Yerkir.am-ի հետ զրույցում «Արցախ» հայրենակցական միության նախագահ, ԱԺ պատգամավոր Համլետ Հարությունյանը նշեց, որ այսօր իրենք հայտարարելու են գործող նախագահին սատարելու մասին: «Հայրենակցական միության շրջանային և գյուղական համայնքների ներկայացուցիչները եկել են այստեղ` իրենց խոսքն ասելու գալիք նախագահական ընտրությունների վերաբերյալ»,- նշեց պատգամավորը:

Բայց թե ի՞նչ են ասելու միջոցառումից անտեղյակ քաղաքացիները, պարզ չէ: