Քոչարյանի հարցազրույցը զվարճացրել է Աշոտյանին

Կրթության եւ գիտության նախարար Արմեն Աշոտյանն Facebook-ի իր էջում անդրադարձել է Ռոբերտ Քոչարյանի այսօրվա հայտարարությանը:

 «Ընթերցելով ՀՀ նախկին Նախագահ Ռ. Քոչարյանի այսօրվա հարցազրույցը` հիշեցի մեկ այլ հարցազրույց, տրված 30.09.2011 թվականին: Մեջբերեմ մեկ հատված`

«Ես չեմ բացառում, որ կվերադառնամ մեծ քաղաքականություն: Սակայն, այդ քայլին ինձ կարող են դրդել ոչ թե այն իրադարձությունները, որ տեղի են ունենում Հայաստանին թեեւ շատ մոտ եւ Հայաստանի համար շատ կարեւոր, բայց, այնուամենայնիվ, ուրիշ երկրում, այլ հետեւյալ երեք գործոնները.

1. երկրի տնտեսական վիճակի եւ մարդկանց բարեկեցության զգալի եւ կայուն բարելավվման բացակայությունը, եւ, որպես հետեւանք' փակուղային տրամադրությունների եւ արտագաղթի աճը;

2. հասարակության տարբեր շերտերի կողմից իմ` մեծ քաղաքականություն վերադարձի պահանջարկը;

3. իմ ներքին համոզվածությունն առ այն, որ ես կարող եմ արմատական ձեւով բարելավել իրավիճակը»:

Փաստորեն, իր չառաջադրման իրական պատճառները ոչ թե այսօր թվարկածներն էին, այլ նախանցյալ տարի սեպտեմբերին բարձրաձայնած գործոնների բացակայության փաստը»,- նրբորեն կատակելով`  գրել է նա։