Ստանիսլավ Եժի Լեցի ''չհարդարված'' մտքերից

Քանի հաղթական կամար է հետագայում ժողովրդի համար լուծ դարձել:

Խոսքն էլ կարող է բերանի փակ դառնալ:

Այնպիսի նահատակներն էլ են եղել, որ խաչելության ճանապարհն անցել են նաեւ հակառակ ուղղությամբ:

Ով դժոխքում ուսադիրներն ուներ, դրախտում էլ է աքսելբանտներով:

Մի' ստեղծեք աստվածներ ձեր կերպարով ու նմանությամբ: 

Հաճախ մուտքն այնտեղ է, որտեղ ելքն է:

Նախավերջին մոհիկանը հաճախ սպանում է վերջինին, որ ինքը դառնա վերջինը:

Քամիները փոխում են ուղեցույցները:

Գաղափարների պայքարում զոհվում են մարդիկ:

Լսելով «Կեցցե առաջընթացը»` միշտ հարցրու` ինչի՞ առաջընթացը:

Օրենքը չիմանալը չի ազատում պատասխանատվությունից, իսկ իմանալը` հեշտությամբ:

Ապագայի սարսափը` շատախոս հուշարձաններ:

Նույնիսկ համաստեղությունները աստղերի ազատ միություններ չեն:

Արյան ծարա՞վ ես, լու դարձիր:  

Բաժանում է ոչ թե անդունդը, այլ մակարդակների տարբերությունը:

Երազում ոչխարների հոտ տեսա` առաջնորդների: Ամեն մեկն` իր զանգակով, իսկ նրանց հետեւից` ոչ մի ոչխար:

Հանրապետություններում էլ են մերկ թագավորներ իշխում:

Ախ, եթե պետության բարձրագույն արժանիքը լիներ մարդկայինը:  

Հարցնում ես` ինչո՞ւ են մարդիկ փախչում նավից, որը չի խորտակվում: Նրանք գլխի են ընկել, թե ուր է այն իրենց տանում:

Ամեն ոք ծնվում է գահին հարմար նստուկով:

Պարզվեց` փրկօղակը շան վզնոց է: