Հրանտ Բագրատյանն առաջադրվում է նախագահի թեկնածու

ԱԺ ՀԱԿ խմբակցության պատգամավոր, «Ազատություն» կուսակցության նախագահ Հրանտ Բագրատյանը ֆեյսբուքյան իր էջում րոպեներ առաջ գրել է.

«Այսօր դեկտեմբերի 20-ն է։ Բոլորը դիմում են «Ազատություն» կուսակցության գալիք համագումարի առնչությամբ։ Համագումարը տեղի կունենա դեկտեմբերի 24-ին` ժամը 12։00, Եզնիկ Կողբացի 69 հասցեում գտնվող խուլ և համրերի պալատում։ Մեր դելեգատները հարցնում են օրակարգի մասով (ոմանք գալու են հեռավոր շրջաններից)։

Օրակարգում, այո, կա ինձ որպես ՀՀ նախագահի թեկնածու առաջադրվելու հարց։ Ուստի բոլոր դելեգատներին խնդրում եմ պարտաճանաչ մասնակցել։ Գտնում եմ, որ առաջիկա ընտրություններում ազատական գաղափարախոսությամբ թեկնածուի ներկայությունը պարտադիր է։ Միաժամանակ տեղյակ եմ պահում, որ եթե Լևոն Տեր-Պետրոսյանն առաջադրվի, ապա ես ի վերջո կհանեմ թեկնածությունս (եթե առաջադրված լինեմ)։

Խնդրում եմ նկատի ունենալ, որ ես ՀԱԿ կողմից չեմ առաջադրվում։ Ավելին, այս ընթացքում ես միառժամանակ դադարեցնում եմ ակտիվ համագործակցությունս ՀԱԿ քաղաքական խորհրդի հետ՝ նրանցից որևիցե մեկին կաշկանդած չլինելու համար»:

Ուշագրավ է, որ դեռ երեկ ԱԺ-ում Yerkir.am-ի այն հարցին, թե առաջադրվելո՞ւ է նախագահական ընտրություններում, Հրանտ Բագրատյանը բառ անգամ չարտաբերեց: Նա առհասարակ երեկ հրաժարվեց պատասխանել լրագրողների հարցերին: