Բաքվի հերթական փուչիկը

Ստեփանակերտի օդանավակայանը հանգիստ չի տալիս Բաքվին: Կոչերը` կանխարգելիչ հարվածներ հասցնել օդանավակայանին, շարունակվում են:

Իրեն «Լեռնային Ղարաբաղի ադրբեջանական համայնք» միավորման նախագահ հորջորջող Բայրամ Սաֆարովը հայտարարել է, որ հայերի գործողությունները սադրիչ բնույթ են կրում:

«Քաղաքացիական ավիացիայի մեջ միջազգային օրենքներ գոյություն ունեն, եւ առանց Ադրբեջանի թույլտվության ոչ ոք չի կարող օգտվել մեզ պատկանող օդային տարածքից»,- հայտարարել է նա եւ հավելել, որ եթե այդ չվերթերն իրագործվեն, ապա Ադրբեջանի զինված ուժերի գերագույն գլխավոր հրամանատարն ու ադրբեջանական ժողովուրդն անհրաժեշտ միջոցներ կձեռնարկեն:

«Եթե նրանք այդպես վարվեն, ապա մի օր իրենց ինքնաթիռները կհայտնվեն ոչ թե երկնքում, այլ գետնի վրա»,- հոխորտացել է Սաֆարովը: