Ամերիկացիները շարունակում են ցույցերը

Նյու Յորքում տնտեսական վիճակից դժգոհողներին օր օրի ավելի շատ ամերիկացիներ են միանում: Ցույցեր են կազմակերպվում  նաեւ երկրի մյուս խոշոր բնակավայրերում:

Սան Դիեգոյի գլխավոր հրապարակում ոստիկանությունը գազ է արձակել ցուցարարների վրա, ովքեր բողոքում էին Ուոլ սթրիթի ֆինանսիստների դեմ: Ոստիկանությունը փորձել է ճեղքել մարդկանց շղթան, ովքեր ձեռք ձեռքի բռնած պաշտպանում էին իրենց վրանային ճամբարը. հաղորդում է Associated  Press-ը:

Վաղ առավոտյան ոստիկանները փորձել են հրապարակից հանել վրանները: Նրանք ցուցարարներին բացատրել են, որ վերջիններս կարող են մնալ հրապարակում, սակայն` առանց վրանների: Այս որոշմանն ընդդիմացող առաջին ցուցարարին ձերբակալել են: Կեսօրին արդեն ոստիկանությունը ուժ եւ արցունքաբեր գազ է կիրառել:

Ցուցարարները ոստիկանների այս գործողություններից հետո հավաքվել են քաղաքային այգում:

«Գրավենք Ուոլ սթրիթը» բողոքի ակցիան անցկացվում է ոչ միայն ԱՄՆ-ի, այլեւ եվրոպական քաղաքներում. երեկ ակցիաներ են տեղի ունեցել Լոնդոնում եւ Միլանում: