Տիմոշենկոյի դատից հետո գազի կռիվը կդադարի՞

Ուկրաինան հույս ունի 10-15 օրում համաձայնության գալ Ռուսաստանի հետ գազափոխադրմանը վերաբերող հարցերում: Այս մասին հայտարարել է Ուկրաինայի վարչապետ Նիկոլայ Ազարովը գրեթե այն նույն պահին, երբ դատարանը կարդացել է նախկին վարչապետ Յուլյա Տիմոշենկոյին 7 տարվա ազատազրկման ենթարկելու մասին դատավճիռը:

Նա մեղավոր է ճանաչվել այն բանում, որ չարաշահել է պաշտոնեական դիրքը եւ «Գազպրոմի» հետ պայմանագիր կնքելիս պետությանը հասցրել է առանձնակի խոշոր չափի վնաս:

Ուկրաինայում Տիմոշենկոյի կողմից ստորագրված գազի պայմանագիրը խրթին է համարվում: Կիեւը պահանջում է վերանայել այն, սակայն Մոսկվան երկար ժամանակ հրաժարվում է անել դա: Միայն վերջերս հայտարարվեց, թե ռուսական կողմը որոշ զիջումների է գնացել: Ներկայումս այս հարցի շուրջ սկսված բանակցություններն ընթացքի մեջ են: